Tim Cheung (@TimCheung)

https://youtu.be/VZnBvxbwMtc?si=QOogPYocJpFl55mn #honda #china 專劏中國1700萬剩男死剩種。二十萬娶個炸彈返屋企？#東南亞 #新娘'騙局笑你窮！ 各位老友記，你估依家十幾萬可以做啲乜？買架二手 #豐田 都未必夠，但竟然有人話——呢個價，可以娶個番鬼婆返屋企！唔使禮金、唔使樓、唔使供車，識生仔識煮飯仲要任勞任怨？聽到呢度，系咪覺得發夢都笑醒？我話你知啦，呢個世界邊有咁大隻蛤乸隨街跳！#央視 最近一嘢踢爆咗個驚天大鑊，專門針對全 #中國 1,700萬「寡佬大軍」嘅跨國騙婚產業鏈，根本系將班恨娶恨到發燒嘅男人當水魚咁劏，一鑊又一鑊，斬到你渣都冇！ 你問十幾萬娶個溫柔聽話嘅 #越南妹、緬甸婆有冇可能？央視話你知：有！但結局系——人，最終會走佬；錢，凍過水；心，碎到一地都系。呢啲黑中介嘅套路，早就唔系新聞，但就系有班傻佬前仆後繼，以為真系執到寶，結果個個攞苦嚟辛，喊都冇眼淚。 你以為依家今年，騙術會高級啲？錯！剛過去嘅舊年，中國警方先一嘢剷平咗個橫跨中國、 #越南、#緬甸 三地嘅超級 #騙婚集團。呢單大案點爆出嚟？講你都唔信，竟然系因為 #山東 邊檢站差佬上網巡更，睇到條廣告寫住「大齡不愁，越南/緬甸新娘，溫柔聽話」——呢啲字眼，擺明車馬系陷阱啦！差佬一睇就知有蠱惑，即刻鎖定發帖人，一個姓肖嘅男人。 呢個肖某，真系唔查唔知，一查嚇親成村人。原來佢早喺2023年就已經系搞跨國相睇騙局嘅嫌疑犯，到咗舊年，直頭升級做咗一條龍產業鏈嘅大鱷！差佬發現，佢成個騙局分境內外兩部分：境外有蛇頭專門去窮鄉僻壤呃啲無知少女返嚟，仲要幫佢哋偷渡入境；境內就由肖某做大佬，負責收留、睇水、包食包住，跟住周圍招攬班心急娶老婆嘅單身狗嚟「揀貨」。 成個過程核突到呢——班男仔俾肖某約出嚟，好似去街市揀豬肉咁，睇中邊個「新娘」，畀低12.8萬到19.8萬人仔，就可以帶返屋企同居試玩。但開心得幾耐？等班男方放鬆戒心，以為終於有老婆暖被窩，唔使幾耐，個「新娘」就會用一千幾百個藉口——阿媽生癌、細佬車禍、家鄉水浸——跟住人間蒸發，連個影都冇。十幾萬買嚟嘅，只系一場短暫又昂貴嘅春夢。 山東警方查得如火如荼，正準備轉移線索畀湖南差佬拉人，點知肖某突然玩失蹤，好似識隱形咁。但天網恢恢，疏而不漏，四個月後，湖南冷水江市一單交通意外，竟然將肖某親手送到差佬面前！你話呢啲系咪整定？ 嗰日，肖某揸車逼停咗一架順風車，車上坐住個叫文某嘅男人。肖某兩仔爺落車同司機理論，點知個順風車突然踩油走佬，仲累到肖某老豆跌到攤攤腰。最離奇嘅系，差佬到場之後，無論系被追嘅文某，定系受傷嘅肖某父子，全部異口同聲話要私了，唔報警！差佬眼利，睇到肖某一直低住頭狂撳手機，行埋一睇——嘩！原來佢緊急刪除緊一大埋外國女人相同婚介合同！呢一下，成單世紀騙案終於浮面。 原來，嗰個被追嘅文某，正正就系肖某介紹畀本地人嘅「緬甸新娘」！當日佢想夾埋境內另一個騙婚同黨着草去安徽，繼續做下一次世界女。肖某點解死追唔放？唔系因為愛情，而系因為佢只收到一半中介費，驚收唔到尾數，先至搏老命攔截。結果糾纏之間意外頻生，成班騙徒自己報警拉自己，呢種橋段，連TVB編劇都寫唔出，偏偏喺現實世界上演！ 警方一不做二不休，順着文某條線，一嘢就搵到佢安徽嘅同黨，再拉多兩個緬甸籍騙婚女。跟住山東、湖南、安徽三地警方聯手，將肖某成個集團連根拔起。呢次跨國大騙局，共刑事處罰63人，行政處罰33人，凍結資產超過500萬人仔！已知嘅受害者有30幾人，但因為怕丑、怕麻煩、怕俾人笑而唔敢報警嘅，估計最少仲有20人以上。而呢班人，只系近年無數婚騙案中嘅冰山一角。 你以為噉就叫慘？太天真！央視再爆料，河北有個網紅短視頻博主叫吳小明，專門拍同越南老婆嘅甜蜜日常。片入面，佢老婆狂食肉，佢就笑騎騎話「任佢食」；成日感恩戴德話「越南女仔唔貪錢，只要錫我」；兩公婆又成日返越南外家，擺滿成台大餐，做到十足孝順女婿咁。呢種幸福假象，呃到唔少恨娶恨到發燒嘅麻甩佬，紛紛留言求介紹對象。 張某就系其中一個水魚。佢阿媽睇完癲咗，逼個仔加吳小明微信，仲喺直播間狂刷禮物刷存在感。幾經辛苦終於換到同吳小明傾計，開口想娶越南新娘。吳小明初頭扮曬矜持話唔得，拖咗幾輪之後先勉為其難應承。跟住就開天殺價：最少20萬！10萬介紹費、10萬禮金、再加2.5萬簽證。廿幾萬人仔，對摺埋心水想結婚嘅張某嚟講，咬咬牙，俾！ 跟住吳小明帶住張某同另外三個麻甩佬飛越南，相睇過程極速完成——四個人有三個成功領到新娘，張某都抱得美人歸。結婚證有、婚禮搞埋，你以為從此幸福快樂？錯！婚後三個月，三個越南新娘一齊玩失蹤！張某追魂call都冇用，反而收到風：吳小明兩公婆因為組織偷越國境被拉咗！而張某個「老婆」嘅海關紀錄顯示，已經着草離境。張某唔識越南文，又冇門路，最慘系吳小明打死唔認騙婚，跨國取證難過登天，最終張某隻能硬食——廿幾萬凍過水，老婆影都冇，得番一身債同埋滿肚冤屈。 但同山西李某比，張某算執到啦！前年，山西李某老母聽村口中介話，十幾萬可以娶個老撾新娘，即刻逼個仔攞錢。中介玩嘢，要先畀錢後見人。李某夾硬俾咗17萬，同幾個同鄉飛老撾。一去到，中介推三個女仔出嚟俾佢揀，李某越睇越唔對路，堅持要驗身。一驗之下，嚇到面都青——三個女仔，兩個有梅毒，一個有愛滋！擺明系想毒死個老公！李某梗系唔制，灰溜溜返中國。舊年再試多次，終於睇中一個，點知去到海關先發現——對方得16歲，未成年！兩次失敗，李某想退錢，中介老細左推右拖，17萬石沉大海。而李某同鄉雖然成功帶返個新娘，返到國內體檢——又系二期梅毒！最後只能原車送返老撾。你話呢啲系咪攞命？ 就算僥倖冇病冇痛，你以為就安心喇？福建張某（又一個張某）又系俾中介斬到一頸血，18.5萬娶個老撾新娘。婚後一年，老婆話要返家鄉「探親」，結果一去冇回頭，搞到張某嚴重失眠、焦慮到要睇醫生。更慘系湖南肖某案入面嘅一個苦主，個「新娘」只系同佢同居五日！趁佢返通宵更，即刻松人！苦主唔見咗全家唯一嘅12.8萬積蓄，父母激到入院，佢自己就搞到重度抑鬱，長期失眠，連街都唔敢出。成頭家散曬，就為咗一場五日嘅假婚姻。 你話班洋新抱傳說中「溫良恭儉讓」？咪玩啦！有成功娶到嘅男人爆料，個所謂新娘，日日淨系識得出去玩，家務惰過懶蛇，老公返工返到死死嚇，仲要擔心佢隨時走佬。呢啲婚姻，由出發點已經腐爛曬，唔單止帶唔到幸福，反而增加一噸煩惱。 但你以為只有中國男人慘？錯！班所謂「新娘」都系受害者。好多外籍少女，尤其系經濟落後地區嘅，以為嚟到中國可以發達，點知俾中介以「介紹工作」為名呃咗過嚟，跟住被逼做騙婚工具。佢哋一批批咁輾轉全國，好似貨物一樣俾男人睇完又睇，簽完約就帶走。所謂「相睇」，根本同賣豬仔冇分別。帶返去之後，逃唔開同居、性侵，跟住過一排又要着草返中介度，再被送去下個城市繼續做世界。就算每單交易十幾萬，落到佢哋手嘅少得可憐。佢哋名義上系「新娘」，實質上系工具人，身心都受到嚴重摧殘。有啲女仔有過七八次婚史，你估佢哋會開心？呢種暴利催生嘅交易，遲早變成人口販賣嘅溫床，無論對中國定系對其他國家，都系極度牙煙嘅毒瘤。 而最令人心寒嘅系，呢啲黑色中介，因為跨國案件取證難、拉人難，大多仍然逍遙法外，繼續偷呃拐騙。能夠被法律制裁嘅，只系極少數仆街鬼。 婚姻，本來系兩個人情投意合、細水長流嘅美好事。但當結婚變成一種執念，當你恨娶恨到失去理智，病急亂投醫咁走去幫襯黑中介，以為用錢可以買到幸福，結果換嚟嘅，只系一個又一個血淋淋嘅悲劇。十幾萬，你買唔到愛情，買唔到忠誠，你只系買到一場精心設計嘅騙局，同埋後半生嘅悔恨。 各位老友記，醒嚇啦！呢個世界冇免費午餐，更加冇十幾萬嘅「完美新娘」。你再恨娶，都要帶眼識人，唔好做下一隻水魚